Watoto zaidi ya 9000 wanakosa furaha ya kwenda shuleni.

 Zaidi ya watoto 9000 wanakosa haki ya kupata elimu kutokana na wazazi wao kuishi katikati ya hifadhi za misitu wilayani Chunya ambako hakuna miundombinu ya aina yoyote inayoweza kuwapatia elimu na huduma za afya.

Licha ya serikali ya awamu ya tano kutoa elimu bure katika shule za msingi na sekondari nchini, kamati ya ulinzi na usalama wilaya ya Chunya ikiongozwa na mkuu wa wilaya hiyo Bi. Rehema Madusa wakati ikiendesha zoezi la kuwaondoa watu ambao wamevamia hifadhi za misitu ya asili wilayani humo, imebaini kuwepo kwa watoto zaidi ya 9000 wenye umri wa kwenda shule lakini watoto hao wamekosa fursa hiyo kutokana na wazazi wao kwenda kuishi maporini ambako hakuna miundombinu ya elimu.

Mbali na watoto hao kukosa elimu, mkuu huyo wa wilaya amesema kuwa maisha ya watu hao wanaoamua kuishi porini kinyume cha taratibu pia yapo hatarini kutokana na kutokuwepo kwa huduma za msingi za kijamii kama vile maji, hospitali na shule.

Afisa maendeleo wa wilaya ya Chunya, Ally Ally amesema idadi kubwa ya mama wajawazito wanaoishi huko maporini wanajifungua nje ya vituo vya afya hali ambayo inahatarisha maisha yao na ya watoto, huku mkurugenzi mtendaji wa halmashauri ya wilaya ya Chunya, Bi. Sophia Kumbuli akiwaagiza maofisa watendaji wa kata na vijiji kutoruhusu tena watu kwenda kuishi maporini kwenye maeneo yao.