Spika Ndugai: Wajiandae kwenda na kasi ya Rais Magufuli

Spika wa Bunge la Jamhuri ya Muungano wa Tanzania Mh. Job Ndugai, amewataka mawaziri wapya walioapishwa hapo jana Oktoba 9 kujiandaa kuchapa kazi kwa nguvu zote, kwani wakati uliopo sio wa kuzembea.

Kauli hiyo ya Ndugai ameitoa jana alipokuwa akiwapongeza Mawaziri hao, ambao awali wengine walikuwa wabunge wa kawaida na sasa kuveshwa kofia za uwaziri, na kwamba wakienda bungeni ni kuchapa kazi kwani walishapata uzoefu miaka miwili iliyopita tangu awamu ya tano iingie madarakani.

"Mheshimiwa Rais ni matumaini ya watanzania kwamba timu hii ambayo inaimarisha Baraza la Mawaziri, na kama tulivyoambiwa hapa wanaanza kazi leo leo kwa kikao cha Baraza la Mawaziri, tunawatakia kila la heri, tunawakiribisheni bungeni, niwaambie neno moja tu mbele yako Mheshimiwa Rais wajiandae, hawa walioapishwa na hawa wengine waliokuwepo, hii miaka miwili ya mwanzo tulikuwa tunachukulia wanajifunza, sasa hivi tukienda Dodoma ni kazi tu", amesema Spika Ndugai.

Hapo Jana Rais Magufuli ameapisha Baraza la Mawaziri baada ya kulifanyia mabadiliko Oktoba 7, na kuwataka waanze kazi mara moja, huku wakikabidhiana nyaraka za ofisi tayari kwa utekelezaji.