Akizungumza na waandishi wa habari jijini Dar es Salaam Jana wakati akisoma maazimio ya kikao cha Baraza Kuu la Uongozi la Taifa la chama hicho, alisema Maalim Seif amekidhoofisha chama hicho kwa kutotekeleza azimio la baraza hilo lililomtaka kufungua kesi Mahakama Kuu ya Zanzibar kupinga kufutwa matokeo ya Uchaguzi Mkuu wa 2015.
“Kesi hizo zingefunguliwa CUF ingekuwa na wawakilishi 27 wa majimbo na viti maalum, idadi ya wawakilishi wa kuchaguliwa na viti maalum wa CUF ingekuwa sawa na idadi ya wawakilishi wa CCM na hivyo Serikali ya Umoja wa Kitaifa ya Zanzibar ingekuwa na mawaziri wa CUF,’’ alisema Profesa Lipumba.
Pia Profesa Lipumba alisema kutokana na Maalim Seif kushindwa kufanya hivyo kumesababisha CCM kubaki peke yao ndani ya baraza na kutunga sheria watakavyo wao ikiwa ni pamoja na kubadilisha sheria ya uchaguzi.
“Pamoja na mazingira haya magumu, Baraza Kuu limeagiza juhudi kubwa zifanyike kulinda katiba ya Zanzibar ya mwaka 2010 inayotaka kuwapo kwa serikali ya Umoja wa Kitaifa", alisema Profesa Lipumba.
“Pia linamshauri Rais Dkt John Magufuli kwa nafasi yake kujiwekea ajenda ya kuimarisha demokrasia nchini ikiwa ni pamoja na kulinda haki za binadamu, kuheshimu haki za vyama vya siasa kufanya mikutano ya hadhara na uhuru wa vyombo vya habari nchini kufanya kazi zao kwa mujibu wa sheria ,’’ alisema Profesa Lipumba.
HALI YA UCHUMI
Aidha, Profesa Lipumba alisema Baraza linatambua na kupongeza jitihada za serikali katika ukusanyaji wa mapato na kutekeleza miradi mikubwa ikiwemo kujenga reli ya kisasa, kufua umeme wa maji kwenye maporomoko ya Mto Rufiji na kuhamasisha uanzishwaji wa viwanda.
Vilevile Profesa Lipumba alisema Baraza Kuu hilo limeelezea chaguzi ndogo za marudio ya serikali kwamba limesikitishwa kwa kuvunjwa utaratibu za uchaguzi katika chaguzi ndogo za marudio na kuitaka Tume kujirekebisha na kuhakikisha wasimamizi wake wanafuata sheria.
“Ni aibu kwa Tanzania kuwa na chaguzi zisizokuwa huru na za haki, miaka 27 baada ya mfumo wavyama vingi kuanzishwa, hivyo kuitaka tume hiyo kujitathmini na kujipanga upya,’’ alisema Profesa Lipumba.
UCHAGUZI WA MITAA
Profesa Lipumba alisema Baraza Kuu limepitisha mapendekezo ya mkakati wa chama ya kujiandaa na uchaguzi wa serikali za mitaa mwakani na Uchaguzi Mkuu wa 2020 na kuagiza kamati ya utendaji iandae program ya utekelezaji huo.
Pia Profesa Lipumba alisema Baraza kuu limeagiza ajenda na Ilani ya CUF itaongozwa na itikadi ya chama ya haki sawa kwa wote, ambazo ni pamoja na haki za kiuchumi, kijamii, kisiasa na za mazingira safi.
No comments:
Post a Comment