Kiwanda cha ARV nchini kutoa ajira 300 na kuanza kuzalisha dozi milioni mbili kwa mwaka.

 

KIWANDA cha Tanzania Pharmaceutical Industry (TPI), ambacho ni pekee cha kutengeneza dawa za kufubaza virusi vya Ukimwi (ARV), kinatarajia kuanza mapema mwakani kwa kuzalisha dozi milioni mbili kwa mwaka na kitatoa ajira 300.

Kiwanda hicho kitaiwezesha serikali kuokoa zaidi ya Sh. trilioni moja inayotumika kuagiza ARV nje ya nchi kila mwaka.

Akizungumza jana na kulunzifikra blog  kwa njia ya simu katika mahojiano maalum, Mwenyekiti wa Chama cha wenye viwanda vya kutengeneza dawa Tanzania, Ramadhani Madabida, alisema pia kiwanda hicho kitazalisha dawa nyingine kama ‘antibiotic’.

Akifafanua uzalishaji utakavyokuwa, alisema katika mwaka wa kwanza wa uzalishaji watatengeneza ARV dozi 167,000 kwa mwezi, ambazo kwa mwaka zitakuwa ni dozi milioni 2.004.

Kwa upande wa dawa za 'antibiotic’ za kasha lenye dawa 100, zitatengenezwa 350,000 kwa mwezi ambayo kwa mwaka ni vidonge milioni 4.2, huku dawa za maji zitatengenezwa chupa za milimita 100 zipatazo 600,000 kwa mwezi ambayo ni sawa na chupa milioni 7.2 kwa mwaka.

“Uzalishaji utakuwa unapanda kwa takribani asimilia asiyopungua 25 kwa mwaka," alisema Madabida na kwamba "uzalishaji huu ni kwa shifti moja ya saa nane."

Madabida ambaye pia ni Mkurugenzi wa Shirikisho la Wazalishaji wa dawa Afrika Mashariki, alisema wanatarajia baada ya miezi sita uzalishaji utaongezeka kuwa wa shifti ziwe mbili kwa siku "na mwaka mwingine tufikie uzalishaji wa saa 24.”

Kwa mujibu wa Madabida, kiwanda hicho kinamilikiwa na serikali asilimia 40 na sekta binafsi asilimia 60, kilipewa msaada wa Euro milioni 6.57 kutoka taasisi mbalimbali za Ulaya.

Alisema kutokana na msaada huo, kiwanda kitaanza katika robo ya kwanza ya mwaka ujao.

“Malengo yetu ni kutoa bidhaa bora ambazo zitapata utambuzi wa Mamlaka ya Chakula na Dawa (TFDA), pia kupata usajili wa Shirika la Afya Duniani (WHO).

“Hadi sasa viwanda vilivyopo nchini vinaweza kukidhi asilimia 11 ya mahitaji nchini, kuna asilimia 80 hadi 89 tunaagiza kutoka nje.

"Dhamira yetu sisi na wenzetu (viwanda vilivyopo na vitakavyokuja kujengwa) tukidhi si chini ya asilimia 60 ya mahitaji ya nchi.”
Kwa upande wake, Waziri wa Viwanda, Biashara na Uwekezaji, Charles Mwijage, alisema Tanzania inatumia Sh. trilioni 1.4 kwenye dawa na asilimi 90 zinaagizwa kutoka nje.

“Kiwanda hiki kikiwepo kitasaidia kuzuia fedha ya walipa kodi kwenda kuagiza dawa nje ya nchi. Tutaongeza wigo wa viwanda kwa kuwa kwa sasa vipo 13 kati yake vitano ndiyo vinafanyakazi,” alisema.