Sheikh Ponda: Nimemuona Tundu Lissu, Nimeumia sana kwa hali yake.

KATIBU wa Jumuiya na Taasisi za Kiislam Tanzania, Sheikh Issa Ponda ameueleza mtandao huu kwamba, amefanya mazungumzo na Rais wa Chama cha Wanasheria Tanzania, Tundu Lissu anayendelea na matibabu jijini Nairobi nchini Kenya.
Kiongozi huyo wa dini ametoa kauli hiyo jana  baada ya kuulizwa na kulunzifikra blog kuhusu safari na malengo yake nchini Kenya ambapo amesema, ilihusu masuala ya kijamii.

“Nikiwa kwenye safari yangu ya masuala ya kijamii nchini Kenya, nimeonana na Mheshimiwa Lissu hospitalini alikolazwa, nilienda kumjulia hali na kufanya naye mazungumzo.”

Sheikh Ponda amesema “Kwa kweli tukio la Mheshimiwa Lissu linaumiza, nimefanikiwa kumwona, lakini nimepanga kuzungumza na vyombo vya habari nchini kuhusu mazungumzo yangu na Mheshimiwa Lissu kesho (Jumatano), naomba uwe na subra mpaka kesho.”

Kwa uchache Sheikh Ponda amesema, pamoja na kumtembelea Lissu, alipata fursa ya kutembelea Kituo cha Televisheni cha Horizon (HORIZON TV).